Camín de Damascu ou... lu de siempres???

Alcuentru nel mieu buzón un mensax, unviáu pur deillos amigos, cuna lligazón darréu:

http://www.diariodeleon.es/noticias/opinion/valladolid-71-142-leon-0_978176.html

Y toos los correyos cul mesmu mensax: "Otro que se cae del caballo......... poco a poco todos nos van dando la razón".

Ensín embargu, dimpués de lleere l'artículu, alcuentru que, "se cae del caballo" d'aqueilla maneira, ye dicire, "al xeitu'l PSOE" que faz responsable la situación llïonesa al goviernu'l PP na Xunta y non a la esistencia mesma d'esta comunidá inventada.

Peme qu'esi ye un analís simple ya erróneu. Nunca nun va defendere la Xana las políticas centralistas del PP cul sou colonialismu p'hacia tolu llïonés, peru non pur eillu va esqueicere las responsabilidades d'outros.

Fou un goviernu central del PSOE el que fizu la reconversión mineira, pechóu'l pantanu Riannu (emplegandu una represión policial más propia d'una ditadura que d'una democracia), fizu tolas obras del trasvase del Esla al Carrión (y pur cima contabilizandu ese gastu cumu "inversión na provincia Llión") y pechóu el fierrucarril la Vía la Plata, pur non citare más que los feichos más sangrantes, y tóu estu encamináu a beneficiare siempres a los mesmos, al "furacu prietu".

Asina que cun esas referencias d'un llau y teniendu en cunta la defensa que sigen faciendu d'esti enxendru de comunidá, d'outru, tengu mui serias dulbias de que la sua xestión p'hacia'l País Llïonés fuera miyor si chegasen a algamare'l goviernu autonómicu.

Dende la criación d'esta autonomía pul consensu ente Peces Barba (PSOE) y Martín Villa (UCD nestoncias y PP n'autualidá) y cunas bendiciones y el sofitu de Felipe González y Adolfo Suárez, el País Llïonés tá en caída llibre. Asina que nun venga naide dicinos que "si you mandu estu dirá miyor".

Nun tengu motivu dalu pa dulbiare sobre las intenciones del robranti d'esti artículu pero tengu tolos motivos pa dulbiare del partíu pul que s'apresenta. La fe tá mui bien pa la relixón, na política queremos feichos y non promesas que valen sólu ata las 20,00 horas del día las elleiciones. Cumu m'adeprendieran las monxinas nel cole "Pulas suas obras yes conoceredes" y, a lu menos pul momentu, nun salen mui bien paraos de la conocencia.

En cualisquier casu, nun sou quien a pescanciare cúmu ye posible que tandu nidiu que las cousas tan diendu mal dende qu'esiste l'enxendru, dende'l partíu que lleva 30 annos na oposición sigan sin querer almitilu.