Entós ¿you qué falu?

Estos cabeiros dias, gracias al pautu nel Conceyu de Llión ente'l PSOE y l'UPL, el debate subre la esistencia de la llingua llïonesa tá na cai y nos periódicos.

Mesmu el conseyeiru la Junta (Sánchez-Pascuala) dixu que la Junta ta dimpuesta a que s'estudie'l llïonés (esu sí cumu "extraescolar, extracurricular y extratodo" nun cumu'l gallegu y el euskara que tan pagadas pula Junta cumu outativas y curriculares). Nas suas proprias pallabras «si hay una propuesta extraescolar, extracurricular y con carácter optativo, seguro que se llega a un acuerdo con la Administración».

Peru ye ablucante lleere dalgunas opiniones subre'l tema. Dende los que, falan de la necesidá de deprendere más matemáticas (que ya tán nel currículum) ata los que, en nome de la globalización (?), solu quieren que los nuesos fiyos deprendan inglés o los que dicen qu'hai que deprendere solu las cousas precisas p'alcontrare un trabayu.

Vraeiramente nun sou quien a pescanciare pur quéi deixar tos estos comentarios solu pa la llingua llïonesa. Habría qu'aplicalos tamién a la filosofía, la plástica, la hestoria, el llatín, l'arte, etc., etc.

Lu que la Xana nun chega a pescanciare ye pur quéi xentes que "falan duas llinguas" (hespañol y castiellanu, jajaja) d'un día pal outru son "grandes filólogos" qu'amuesan el sou saber diciéndunos qu'el llïonés ye una llingua muerta, que naide fala nin escribe. Y eiquí la Xana entrúgase ¿Dious mieu, entoncias qué llingua yé la que tou falandu?